IRAKURGAIA: Pobrezia, giza eskubideen arazoa
 

Nazio Batuen Garapenerako Programaren datuen arabera, munduan 800 milioi lagunetik gora bizi dira egunean 1,25 dolarrekin baino gutxiagorekin, eta askok ez dute jatekorik eta edateko urik eskuragarri, ezta saneamendu egokirik ere. 

«Inoizko garapen ekonomikorik handiena eta baliabide teknologikorik eta bitarteko finantzariorik gehien dituen mundu honetan, eskandalu morala da milioika lagun pobreziarik gorrienean bizitzea», Muturreko Pobreziari eta Giza eskubideei buruzko Printzipio gidarien hitzaurrean esaten den bezala.

Pobrezia ez da arazo ekonomikoa bakarrik. Horregatik, ez diogu begiratu behar diru-sarrerarik eza baino ez balitz bezala. Fenomeno dimentsioaniztuna da, duintasunez bizitzeko oinarrizko gaitasunen gabezia ere barne hartzen duena. Pobrezia, berez, giza eskubideen arazoa da, premiazkoa, eta aldi berean giza eskubideak urratzearen kausa eta ondorio. Pobreziak, bada, eskubide zibil, politiko, ekonomiko, sozial eta kulturalen urratzea du ezaugarri. Pobrezian bizi diren pertsonek beren duintasuna eta berdintasuna ukatzea jasan behar dute. Pobrezia gutxitzea eta desagerraraztea, beraz, gizarte guztien betebeharra da.

Orain 31 urte, 1987ko urriaren 17an, Joseph Wresinski apaizak pobreziaren aurka borrokatzeko deia egin zuen, Muturreko Pobrezia gainditzeko Munduko Eguna “ospatzera” animatuz. Bost urte geroago, Nazio Batuen Biltzar Orokorrak, dei horretan inspiraturik, urriaren 17a Pobrezia Desagerrarazteko Nazioarteko Egun deklaratu zuen (47/196 ebazpena).

Aurtengo gaia:

“Baztertuenekin bat egin, giza eskubideak eta duintasuna erabat errespetatuko diren mundua eraikitzeko”.

Informazio gehiago:

http://mundosinmiseria.org/article/nota-explicativa-del-tema-del-17-octubre-2018

https://www.un.org/development/desa/socialperspectiveondevelopment/wp-content/uploads/sites/27/2018/09/nota-explicativa17octubre2018.pdf